-

 பின் நவீன அரசியல் கவிதைகள்…1

ஒரு சிட்டுக் குருவி
பரணில் தொங்கிக் கொண்டிருக்கும்
என் உணவு வழங்கல் அட்டையில்
கூடு கட்டத் தொடங்குகிறது…
அது தனது தகுதியற்ற அலகால்
ஆயிரம் உரூபாய்களை
சுமப்பதற்கான ஒத்திகை முயற்சியில்
அமர்வதும் பறப்பதும்
வைக்கோல் பிசிறொன்றை
ஆனந்தமாய் உட் செருகுவதுமாய்
என்னை வசீகரிக்கிறது…
மின்சாரக் கம்பிகளில் அமர்ந்து
பிறகென் பரண் மேல் அமரும்
குருவி மாயத்தால்
என் உடலெங்கும்
ஆயிரம் ரூபாய் மின்னழுத்தம்
ஒளிரல் தருகிறது…
ஒற்றை ஆயிரம் உரூபாய்த் தாள்
எப்போதோ உயிர் துறந்ததால்
இரண்டு ஐந்நூறு தாள்களை
உள் வாங்கக் காத்திருக்கும்
குடும்ப அட்டை விட்டத்தில்
குருவி சற்று நேரம் அமர்ந்து
விருட் விருட் டென
உயிர்ச் சிறகடித்து உசுப்புகிறது…
சிட்டுக் குருவிகளின்
அழிவின் காலத்திலா
ஆயிரம் உரூபாய்களுக்கான
உரிமையின் காலம்
தொடங்க வேண்டும்…
என் தகுதிக்கான
உலர் வைக்கோல் பொய்யொன்றை
என் பிரமாண பத்திர மார்புகளின்
நடுவில் வெளித் தெரியும் படி
செருகி வைக்கிறேன்…
தகுதிக்கான விண்ணப்பக் கேள்வி காகங்கள்
என்னொத்த சீதாப்பெண்களின்
மார்பின் வைக்கோல்பிரிகளின்
தரம் பிரிக்க
கொத்திக் குதறுகின்றன…
குருவி அமர
உதிரம் சொட்டும்
என் பரண் மட்டுமல்ல
இப்போதென்
மார்பும் இரண்டாய் பிளந்து கிடக்கிறது…
விண்ணப்ப வைக்கோல் பிரிகளும்
பஞ்சும் பஞ்சமும்
நிரப்பிய பிரமாண பத்திர
சுமை தாங்க முடியாமல்
பறந்து சென்ற
மீதிக்குருவிகள் மின் கம்பிகளில்
இளைப்பாறத் தொடங்குகின்றன…
காகங்கள் வழமை போல்
உரிமைகளை தின்ற பின்னும்
கத்திக்கொண்டிருக்கின்றன…
என் குருவியை
தாங்கும் தகுதியற்ற
என் விட்ட அட்டையின்
கூட்டிற்குள்ளா
புயல் வீசவேண்டும்…?
மின் கம்பியில் அமரும்
தகுதியிருக்கும் குருவி கட்டிய
கூட்டிற்கான
நிரூபணம் தேவைதானா..?
என்னிடம் ஆயிரம் உரூபாய்க்கான
தகுதியில்லாமல் போகலாம்…
ஆனால்
என் குருவியிடம்
சிறகுகளும்
என்னிடம் ஓட்டுரிமையும்
மின் கம்பிக்குள்
மாற்றத்திற்கான நெருப்பும்
எப்போதும் இருப்பதை
இந்த அரசு
இப்போதாவது அறியுமோ…?
ராகவபிரியன்
பறவை மற்றும் , ’IE HOW BIRDS DEFY ELECTRICITY?’ எனச்சொல்லும் உரை இன் படமாக இருக்கக்கூடும்

Comments

Post a Comment

Popular posts from this blog

-
Image
  முந்திரிப் பொங்கல்...சிறுகதை.. பொங்கல் அன்று உத்தியோகம் அவனுக்கு. அதுவும் மனித வாடையற்ற அத்துவானக் காட்டின் நடுவில் இருக்கும் ஒரு தொடர்வண்டி நிலையத்தில். சக ஊழியர்கள் அவன் அந்த மாவட்டத்தைச் சேர்ந்தவனென்பதால் அவனை டூட்டியில் விட்டுவிட்டு திருனெல்வேலி நாகர் கோவில் எனும் சொந்த ஊர்களுக்குச் சென்றுவிட்டார்கள்.. அது கைபேசி உடலுடன் ஒட்டப்படாத காலம். தொலைக்காட்சிப் பெட்டி என்ற சொல்கூட வழக்கில் இல்லாத நகர்த்த கடினமான காலமது..காட்டிற்குள் தனித்து விடப்பட்ட ஒரு மானின் மருண்ட பார்வையுடன் நிலையத்தைச் சுற்றி சுற்றி பார்த்துக்கொண்டிருந்தான். நேற்றிரவிலிருந்து அவன் பணியில் இருக்கிறான். விடியல் பனிச்சூழலும் பசியும் நகர்த்தவியலா நேரமும் அவன் தோளில் தேனீர் அருந்தியாக வேண்டிய சுமையை ஏற்றத் தொடங்கியது. சுமைகள் நாவிலிருந்து தோளில் ஏறுகையில் ஒருபோதும் சறுக்குவதில்லை.. நிலையத்தின் அருகில் இருப்பது ஒரே ஒரு தேனீர் கடை.. அது காலை ஐந்து மணியிலிருந்து ஆறு மணிவரைதான் இயங்கும். மாலையிலும் அப்படித்தான். வேறு வழியில்லாமல் அங்கே அவன் தேனீர் அருந்தும் போது அதில் கலந்திருக்கும் எருக்கஞ்செடியின் காய்ந்த குச்சிகள் வ...
Read more
-
Image
  ராகவபிரியனின் ரசவாதக் கவிதைகள்…பாகம் 5  1. பள்ளிக் கூரை தொடும் பெதும்பையின் ஊதும்பைகள்   அந்தப் பள்ளி வளாகத்தின் கதவில் நெகிழித் துணியின் வண்ண வடிவமைப்பில் சந்தனப் பேழையொன்று குழந்தைகளை உள்வரச் சொல்லி பவ்யமாய் நீள்கிறது அன்புத்தாயின் கரமுடன்..   பெற்றோரும் குழந்தைகளும் அலுவலக அறையில் தொங்கும் வண்ண ஊதும்பைகளில் ஈர்ப்புடன் சட் டென தாவி ஏறி தங்களை நிரப்பிக்கொள்கிறார்கள்..   அவர்களையும் மீறி  அவர்களுடனும் குழந்தையுடனும் மேலெழுகிறது வண்ண வண்ண நம்பிக்கை வளிக்கூடுகள்..   தாயின் கரமென வாஞ்சையுடன் நீளும் பள்ளியின் கை நகங்களெங்கும் அப்பியிருக்கும் சாயமிழந்து மூடிக்கிடக்கும் மூலதன கட்டணப் பூச்சுகளைச் சுட்டிக் காட்டுகிறாள் முன் மழலையர் வகுப்பில் சேரப்போகும் மழலைப் பெதும்பை.   பற்கள் உதிர்ந்த வயோதிக பொக்கைவாய்ச் சிரிப்புடன் கோட்டோவியக் குழந்தைகள் விளையாடும் விளையாட்டுக்கள் வரையப்பெற்ற சுவரில் காந்தி அவருக்கான   அத்தனை உயரத்தில் இன்னமும் கருப்பு வெள்ளையில் வெகுளியாகத்தான் தொங்கிக்கொண்டிருக்கிறார். ...
Read more
-
Image
  ராகவபிரியனின் நகைச்சுவைக் கதைகள் விரைவில் புஸ்தகா மூலம் அச்சில்.. முன் பதிவு செய்வோர் இப்போதே ரூ 500/  9442536901 எனும் எண்ணிற்கு அனுப்பி விவரங்களை முகவரியுடன் இதே எண் வாட்ஸப்பில் அனுப்பினால் விரைவில் ஏற்கனவே அச்சில் வெளிவந்த ராகவபிரியனின்  மேலும் சில புத்தகங்களுடன் உங்களுக்கு வந்து சேரும்.. நன்றியும் அன்பும்...உங்கள் ராகவபிரியன்
Read more